STRUWIG BOSVELDPLAAS

~ ons eie plaas in die boendoes ~

Na die dood van ‘n ene Mnr Petrus Cornelius Struwig, of oom Struwig soos hy maar aan almal van ons bekend is, het dit aan die lig gekom dat hy sy plase, Zeekoegat, Dundee, Lisbon en Klipheuwel, bemaak het aan die JRB (nou RRB), Voortrekkers, KJA, FAK en Volkspele.

Hierdie plase beslaan nagenoeg 3000 hektaar en is aangrensend tot die die Olifantsrivier / natuurreservaat aan die een kant en Klaserie / Kruger Wildtuin aan die anderkant.  Padlangs is dit ongeveer 40 kilometer vanaf Hoedspruit, en soos die kraai vlieg is dit 10 km vanaf Phalaborwa. Die plaas kan egter slegs vanaf Hoedspruit bereik word. ‘n Aspek wat hierdie grond eweneens so spesiaal maak is die feit dat dit een van min plase is wat oewer regte van die Olifantsrivier kan geniet.

‘n Bepaling van die testament was dat indien van die erfgename sou besluit om van hul nalatingskap ontslae te raak die helfte van die opbrengs vir kanker navorsing beskikbaar gestel moet word – vandaar die Germishuysen-Struwig Kankernavorsingtrust. Beurse is gedurende 1999 vir die eerste keer aan kandidate toegeken wat spesifiek in kankernavorsing studeer.   Met ‘n sterk jeug komponent onder die erfgename is dit ook die wens van die PC Struwig Trust dat die plaas gebruik moet word vir jeugontwikkeling.

Die FAK en Volkspele het besluit om hulle grond aan Sybrand vd Spuy, ‘n aangrensende grondeienaar te verkoop.   Na hierdie transaksie was ‘n maatskappy gestig (Struwig Bosveldplaas maatskappy) waarop Mnr vd Spuy 40 % en die drie kultuur organisasies elkeen 20 % of 60 % gesamentlik besit. Vir die bestuur en handhawing van die jeug se bate is die Struwig Trust gestig met begunstigdes daarvan die RRB, Voortrekkers en KJA.

Op die plaas is wild volop en word koedoes, kameelperde, rooibokke, ystervarke, vlakvarke, waterbokke, leeus, olifante, buffels, blouwilde beeste , zebras, seekoeie, hiënas, krokodille, bosbokke, steenbokke, duikers, renosters, ensovoorts gereeld gesien.  Selfs die GROOT 5 word gereeld opgemerk.  Skaarser diersoorte soos Sharpe’s se grysbok, klipspringers, luiperds en jagluiperds, siwet- en rooikatte is ook al van tyd tot tyd opgemerk. Daar is ook meer as 200 spesies voëls waarvan 6 visarende in die kamp se omgewing nes maak en gereeld gesien word besig om vis te vang in die rivier reg voor die kamp.

Die eiendom self bestaan uit 10 rondawels en ‘n huis. Die rondawels is teen die oewer gebou en staan bekend as die Oewer kamp. Die familie huis, Uitsig,op ‘n koppie reg bokant die rivier was die tuiste van die Struwig egpaar en is ook omskep in heerlike verblyf suites.

          

Planne was vir ‘n goeie 18 maande beraam en deurdink maar aan die begin van 1999 het die verbeterings begin.  Die rondawels was ten volle oorgedoen, warm water geriewe vir dames en mans is gebou en voorsien, die Oewer huis is omskep in ‘n raadsaal vir 24 mense met ‘n ingangsportaal en gerieflike kombuis.  ‘n Groot lapa is aangrensend daartoe gebou met ‘n gerieflike braai area wat direk oor die Olifants rivier uitkyk.  By Uitsig was die huis ook opgeknap en ‘n swembad is geïnstalleer vir die somerdae wat maar kan warm raak.

Hier is nog foto's van die plaas, die diere en alles en nog wat. E-pos vir ons ook van julle foto's vir publikasie op die foto blad.

       

       

BESPREKINGS:   Lede kan net die nodige besprekings doen om 'n sorgvrye naweek in die Bosveld saam met hulle gesinne te geniet.  Skakel met die RRB HK vir die nodige rëelings.    Vergewis uself asb ook met hierdie inligtingstuk indien u van plan is om die plaas te besoek.