Bybelvasvra geskiedenis
Danksy groot entoesiasme van Rapportryers, skoolhoofde, leraars en ouers,
het 64 leerlinge op 16 Oktober 1977 aan die heel eerste vasvra deelgeneem.
Gedurende 1980 het Secunda ook sodanige vasvra begin aanbied en het die
eerste kompetisie tussen streke gedurende 1981 plaasgevind.
Gedurende 1983 is die hoofkantoor van die Beweging gevra om die
handleiding van hierdie kompetisie landswyd te versprei en gedurende 1985 het
die Rapportraad besluit om hierdie kompetisie die status van ‘n nasionale
projek te gee en dit vanaf 1986 op ‘n nasionale basis te laat plaasvind.
Na die nederige begin in 1977 het hierdie vasvra in die eerste jaar waarin
dit nasionaal aangebied is, 300 skole en instansies betrek wat spanne ingeskryf
het.
Hierdie vasvra is nou een van die RRB se prestige projekte.
Vanaf 1986 tree mnr. en mev. O.A.W. van Zyl as beskermpaar op en in hierdie
hoedanigheid oorhandig hulle tydens die eindrondte die pryse.
Weens die afwesigheid van ‘n borgskap, is die vasvra nie in 1993 aangebied
nie, maar AKPOL (Afrikaanse Kultuurvereniging van die Polisie) het die RRB in
staat gestel om sedert 1994 die vasvra weer met nuwe ywer te kon aanbied.
Sedert 1997 kon AKPOL ook nie meer help nie a.g.v. die besnoeïng van fondse
in die SAPD. Die RRB het egter
deurgedruk en die koste self gedra vir die kompetisie.
Dit het egter broekskeur gegaan en die RRB was ook genoodsaak om slegs
die nodige te kon aanbied vir die deelnemers.
Dit is met wense dat ons hoop om weer ‘n borgskap te vind om hierdie
puik kompetisie in die nodige fleur te laat geskied waaraan dit gewoond was die
afgelope 21 jaar. Gedurende 1999
het 400 spanne regoor die land in 27 verskillende uitdunrondtes deelgeneem. Een en tagtig spanne het aan die einde van Augustus meegeding
om ‘n plek in die halfeindrondte. Tien
spanne het deurgedring na die eindrondte wat plaasgevind het by die Sinode saal
van die Gereformeerde Kerk op Potchefstroom.