McGregor. Vroeër mog ons nie na die buiteland gereis het nie, hoewel die rand sterk was. Vandag is dit moontlik, maar dikwels veels te duur.
Dat dít 'n rede is waarom dorpies in die Kaapse binneland ontpop as naweekwegbreekplekke, betwyfel ek nie. Nes die alombekende dorpies in die Britse platteland, Provence in Frankryk en die Toskane in Italië, wen nedersetting soos Barrydale, Stanford, Montagu, én Greyton hier flink veld.
'n Spanperd is McGregor 19 km suid van Robertson en twee uur se ry van Kaapstad af deur die wynlande.
Dis hier dat ek 'n vrou raakloop wat vir 'n naweek kom uitspan het, maar jare later steeds hier woon. Nie dat dit my verbaas nie, want ook ek het dit geniet om my tyd hier te verspil.
Deur die jare het McGregor reeds die makers van viole, teddiebere en uiteraard wyn gelok. Hier's antieke winkels, menige geskiedkundige geboue, 'n kaktusplaas, koffiewinkels en terracotta van hoë gehalte. Die kos is so lekker dat jy wens jy kon soos 'n koei herkou.
Met sy leiwater, vrugteboorde, netjiese roosterplan en goed bewaarde geskiedkundige huise word McGregor beskou as een van die beste voorbeelde van 'n middel 19de-eeuse dorpie in die Wes-Kaap. Wit kothuise met grasdakke en eenvoudige sygewels staan ingeryg langs Georgiaanse dubbelverdiepinghuise.
Vir die eerste sowat halfeeu van sy bestaan het die dorp Lady Grey geheet, na die vrou van sir George Grey, die Kaapse goewerneur. Dit het egter verwarring met die gelyknamige dorp in die Oos-Kaap veroorsaak en in 1903 is dit hernoem na eerwaarde A. McGregor.
McGregor het die laaste jare 'n blyplek geword vir aanhangers van menige esoteriese/spirituele leefstyle en holistiese maniere van heling. Leer, praktiseer of ervaar bloot aromaterapie, meditasie, joga, Reiki, Shiatsu, Thai Chi, terapeutiese danse, Sjamanisme en Afrika-dromwerksessies.
Die hartjie hiervan is die Temenos Retreat Centre in die middel van die dorpie met sy kunsgalery, biblioteek, asook bistro en café. Die kos hiér smaak vorentoe.
Saligheid vir die sintuie is ook te vind in die Vrolikheid-natuurreservaat met onder meer Kaapse grysbok, klipspringers, springbokke en 180 voëlspesies. In Augustus en Oktober is die reservaat van 2 004 ha oortrek met gous- en ander veldblomme. Somermaande is dit buitengewoon warm en droog, terwyl die winters nat en koud is. Vrolikheid kan langs die Heron-staproete (3 km) of die daglange Rooikat (16,5 km) verken word.
'n Raps korter as die Rooikat is die Boesmankloof-voetslaanpad (14 km) wat die stapper deur die Riviersonderend-berge neem. Dié staproete strek in die rigting van Greyton en begin by 'n punt sowat 12 km van McGregor, genaamd Die Galg. Dit word só genoem omdat die pad hier onverwags eindig. Dié cul de sac lei deur tipiese fynbos waaronder talle proteas.
Ek kan dink dat die Kapenaars telkens na McGregor en omstreke wil terugkeer.