NEW YORK, NEW YORK. Sedert 1996 stel die New York-gebaseerde Wêreldmonumentefonds (WMF) 'n lys op met 100 kulturele en historiese skatte waarvan die bestaan bedreig word. Soortgelyk aan die bedreigde spesiestatus van wildlewe-lys fokus die WMF die aandag op plekke met die hoop dat dit bewaar sal word.
In die geval van Ellis Island het dit vrugte afgewerp - baie daarvan. Nadat dié eiland in 1996 op die WMF-lys verskyn het, is $300 miljoen binne vier jaar geïn en kon 'n uitgebreide restourasieprojek begin.
Ellis Island Immigration Station het sy deure vir die wêreld geopen op Vrydag, 1 Januarie 1892. Annie Moore, 'n 15-jarige Ierse dogter, was die eerste om ondervrae te word.
Vandag is sowat 40 % van Amerikaanse burgers afstammelinge van immigrante wat deur Ellis Island die VSA betree het. Gedurende die 60-jarige geskiedenis van dié doeanepos in New York Bay het 12 miljoen hoopvolle immigrante hierdeur beweeg.
Hieronder tel die musikant Irving Berlin wat vanaf Rusland gekom het in 1893; komediant Bob Hope (1908, Engeland); en die Von Trapp-familie van "Sound of Music"-faam (1938, Oostenryk).
Sedert 1954 het Ellis Island in onbruik verval. 'n Kwarteeu later is 'n deel van die eiland opgeknap waaronder mettertyd die immigrasie-museum wat deesdae een van New York se top vyf attraksies is. Die res waaronder die oud-hospitaal het net verder agteruit gegaan. Met die geld wat bymekaar gemaak is weens die WMF-lys sal hieraan nou behoorlike aandag gegee kan word.
By die museum leer hul jou dat meer as 60 miljoen mense van die wêreldoor na die VSA gekom het "om 'n multi-etniese nasie te vorm ongekend in die geskiedenis."
Circle Line's se Miss New York vaar binne 20 minute vanaf Battery Park in Lower Manhattan na die Statue of Liberty en Ellis Island. Kaartjies kos $8. Circle Lane kan geskakel word by 212-269-1135 vir verdere info.
O, ja - jou mede-passasiers op die boot gaan beslis meer uiteenlopend wees as die hoofsaaklik Europese immigrante wat destyds geland het by dié poort tot die VSA.

• Op die huidige Top 100-lys van die WMF word nege plekke in Afrika vermeld wat dringend opknappingswerk nodig het. Hieronder tel die Larabanga-moskee in Ghana, Thimlich Ohinga Kulturele Landskap in Kenia, Medine Fort in Mali, Benin Stadsaardwerke in Nigerië, Bagamoyo historiese dorp in Tanzanië en vier plekke in Egipte waaronder die Vallei van die Konings by Thebes.